Trak ni Caminero natagak, 1 patay

CEBU - Usa ang patay ug upat ang naangol dihang natagak sa kimba ang trak de karga nga puno sa mga sinanggi nga mais nga gipanag-iya ni Board Member Wilfredo Caminero sa bukirang bahin sa barangay Lapay lungsod sa Argao niadtong Biyernes sa alas 5:30 sa hapon.

Dead on Arrival sa tambalanan ang drayber nga si Jose Sebellano, 27, samtang ang mga truck boy niining naangol mao sila si Miguel Nasilla, 21, Walter Alcain, 22,ug magsuong sila si Patrocinio ug Nicomedes Mansueto.

Matud ni PO1 Benjamin Geyrosaga sa Argao Police dihang nahinabi sa Banat News gikan sa barangay Lapay proper ang maong trak ug naghakot sa mga sinanggi nga 30 ka sakong mais.

Sa dayon nang biya sa trak namatikdan sa drayber nga dunay deperensiya ang manobela sa sakyanan nga gahi lubagon apan nipugos gihapon kini sa paglarga.

Gibutyag sa mga naangol nga truck boy niungot ang manobela pag-abot sa utlanan sa barangay Lapay ug barangay Catan hinungdan sa ilang pagkahulog sa lawom nga kimba sa maong lugar nga gibana-banang 30 metros ang gilawmon.

Ang drayber maoy nadala sa pagkatagak sa sakyanan lahos sa ubos nga bahin hinungdan nga mao kiniy na-grabehan samtang ang upat ka mga truck boy nakahigayon kini sa pag-ambak ug nangasamad ug dagkung pangos sa kalawasan.

Matud pa nabali bali ang gusok sa tiyan sa drayber ug nabunal pa ang ulo niini samtang nagligid nga natagak sa kimba ang gimaniho niining sakyanan.

Gidala sa Isidro Kintanar Memorial Hospital sa maong lungsod ang biktima apan gideklarar nga patay na. – BANAT