Tawo nakuryentihan

CEBU – Natagak ang usa ka construction worker dihang nakahikap kini’g buhing kuryente ibabaw sa coliseum sa lungsod sa Argao samtang nagtaod kini og karatola para sa piyesta.

Si Gregorio Rojo Siarot, 33, minyo, nga taga barangay Veto, lungsod sa Balamban nabalian gyud sa bukton ug nangasamad ang dagway dihang napantok kini sa baldusang semento nianang alas 10:30 sa buntag.

Matud ni PO1 Eduardo Semilla sa Argao Police Station nga nahinabi sa Banat News nga si Siarot nagdali nga mahuman sa pagtaod og karatola nga giandam alang sa nagsingabot nga piyesta sa lungsod.

Apan sa tanto niyang dali-dali, wala siya makabantay sa linya sa kuryente nga napanit, hinungdan nga dihang nahikapan niya kini   mikurog siya apan imbis mopilit, nakabuhi siya ug mitiurok ngadto sa ubos.

Tungod kay may gilawmong 12-15 ka tiil, maayong pagkabali sa iyang walang bukton ug nagtungaytungay nalang kini dihang gihatod siya ngadto sa Isidro Kintanar Memorial Hospital sa maong lungsod.