50 ka makililimos gihipos sa dakbayan

CEBU – Dul-an sa 50 ka mga makililimos ang nahipos sa Cebu City Anti-Mendicancy Task Force (CCAMTF) niadtong miaging buwan.

Kini maoy gibutyag ni Isabelita Ganob, ang labaw sa CCAMTF dihang ila nga gisaulog ang Anti-Mendicancy Month sa buwan sa Agosto.

Niingon si Ganob nga mga batang libudsuroy maoy kasagaran nilang nahipos gikan sa pagpakilimos diha sa kadalanan nga gilangkuban sa 13 ka mga babaye, samtang 33 ang mga lalaki nga makapila na mahatod ngadto sa Community Scout, Pari-an Drop-In Center, ug sa uban pang institusyon.

Nagkanayon si Ganob nga sagad sa maong mga makililimos nagagikan sa barangay Mambaling, Sawang Calero, ug Duljo-Fatima sa habagatang distrito sa dakbayan, samtang ang uban gikan usab sa barangay Lorega-San Miguel ug Carreta sa amihanang distrito sa siyudad.

Matud ni Ganob nga gawas sa mga minor de edad, duna usab silay nasikop nga mga hamtong nga nagpakilimos sa kadalanan ug igo ra silang gipaserbisyo sa komunidad agi og silot.

Base sa Anti-Mendicancy Ordinance sa dakbayan mahimong pamultahon og P1,000 ang makalapas niini o mohimo og upat ka oras nga community service.

Lakip nga pahamtangan sa nahisgutang multa ug silot mao kadtong mga tawo nga mohatag og limos sa mga mendicants diha sa kadalanan.

Kini giingon ni Ganob nga maoy ilang hingusgan karon tungod sa ilang pagtoo nga walay magpakilimos kung walay mohatag og limos.

Subay niini, gipasidan-an sa labaw sa task force ang mga Sugbuanon nga dili nila pasayluon kung ilang masakpan nga mohatag og limos.

Gipadayag ni Ganob nga bisan kung natapos na ang Anti-Mendicancy Month, apan magpadayon gihapon ang ilang inadlaw-adlaw nga kalihukan.

Gani niingon si Ganob nga ilang palapdan ang ilang operasyon pinaagi sa pag-hire og dugang mga personnel nga motabang sa ilang kampanya.

Gawas niini, gisugyot usab sa task force nga paapilon ang mga traffic enforcer pagmonitor ug pagbadlong sa mga magpakilimos.

Samtang organisahon usab sa CCAMTF ang Barangay Anti-Mendicancy Task Force sa kabarangayan pagpalig-on sa ilang kampanya.