Mosyon ni Corro gitugtan sa korte

Gitugutan na og gimandoan sa RTC branch 61 sa Bogo si Engr. Agusto “Dodong Itok” Corro sa paglingkod isip mayor sa Daanbantayan human i-grant ang Motion for the execution of judgement pending appeal batok sa nilingkod pagka  mayor ug bise mayor sa lungsod sa Daanbantayan.

Atol sa press conference kagahapon sa hapon si Atty. Liza Corro pormal nga mipahibalo nga pabor ngadto kanila ang decision ni Bogo RTC Hon. Judge Antonio Marigomen sa ilang gipasakang Joint Motion for Execution of Judgement Pending Appeal sa midaug sa korte nga sila si Engr. Augosto Corro, pagka mayor ug Dr. Jose de Leon, pagka bise mayor niadtong Agosto 22 ning tuiga.

Base sa mando ni Marigomen  usa sa rason mao ang public interest or will of the electorate, ikaduha ang kagamay nalang sa nahabiling termino sa ilang gitinguhang posisyon ug ikatulo mao ang gitas-on na sa panahon nga na-pending ang maong protesta ug naestablisar na usab sa korte nga pilde na si Shimura ug Loot.

Si Corro mipasangil nga gipatawag ni Loot ang mga magtutudlo ug gipugos sa pagpapirma sa daan nang binuhat nga affidavit nga nagpadayag nga limpiyo ang election sa miaging Mayo tuig 2007.

Si Corro mipasalig nga dili siya mohimo og kasamok bisan pa sa maong kamanduan sa korte hangtud di mapupos ang 20 ka adlaw nga tagal sa paghatag og higayon sa kampo ni Loot nga makakuha sa Temporary Restraining Order o TRO.

Sa pikas bahin, si Loot nga nahinabi sa Banat News mipadayag nga daan na nilang nasayran nga pabor si Judge Marigomen sa kampo ni Corro gumikan kay kini usa na ka “package deal” sa iyang kaatbang.

Hinuon mihimo og lakang ang iyang mga abogado sa pagkuha og TRO ngadto sa Comelec ug uban pang legal nga proseso nga dili gyud makalingkod si Corro sa Daanbantayan.

Gipanghimakak ni Loot ang pagpamugos sa mga magtutudlo sa pagpapirma og hinimo daang affidavit gawas nga iyaha silang gipatawag aron sutaon nganong dunay mga fake ballots nga naapil sa mga ballot boxes ug dunay mga balota nga sinuwat sa usa lamang ka agi sa kamot.

 Apan matod pa ni Loot ang 500 kapin ka mga magtutudlo mihimakak sa mga pasangil ug boluntaryong miluwat og affidavits nga nagsulting limpyo ug walay tikas nga nahitabo.