Agtang tabas

Natabas ang agtang sa usa ka lalake dihang gitigbas kinig pinuti sa iyang silingang hubog niadtong miaging gabii didto sa sitio Maharlika, barangay  Subangdaku, dakbayan sa Mandaue.

Ang biktima mao si Filemon Liumagsao, 20, taga Maharlika, samtang ang suspetsado mao si Dominador Ligao, hingkod, minyo, nga silingan ra sa biktima.

Si SPO1 Alfredo Andales, imbestigador sa kapolisan sa Presinto 2 sa Subangdaku Police Station mibutyag sa Banat News nga sa sayo pa nagkalalis ang biktima ug ang suspetsado.

Dihang miinit na ang lalis, ang suspetsado nga hubog, wala kaantos ang mikuha kinig pinuti sa ilang balay.

Sa pagbalik niini, gihapsan dayon ang biktima nga nagpungko sa daplin sa karsada.

Maayo gani kay nakahupo ang naulahi ug didto motugpa ang suwab sa iyang pinuti sa agtang sa biktima busa natabas kini.

Dali nga gidala sa mga silingan ang biktima ngadto sa tambalanan samtang ang suspetsado misibat usab dayon ug gipangita pa karon sa kapolisan.