Giluba 13 samad

Natusak sa 13 ka samad dinunggaban ang tibuok kalawasan sa usa ka 21 anyos nga lalake dihang gitabangan siyag luba sa tulo ka wala hiilhing tawo nga mibanhig kaniya didto sa barangay Nangka lungsod sa Balamban niadtong Lunes sa alas 2:40 sa kaadlawon.

Ang biktima mao si Rogelio Bacalso Radaza, 21, ulitawo, nga lumad nga taga San Isidro, siyudad sa Talisay apan kasamtangan nga nagpuyo  sa barangay Nangka, Balamban tipon sa iyang igsoon.

Matud ni PO1 Alby Agua sa Balamban Police Station nga nahinabi sa Banat News nga ang biktima gikan nga mitambong og disco sa Sitio Riverside sakop sa barangay Nangka .Apan dihang mipauli na kini kauban sa iyang barkada nga si Grego Cerentas, 21, pag-abot nila sa ngitngit nga lugar kalit silang gibabagan sa tulo ka tawo ug walay daghang estorya gihansakan dayon ang biktima sa dalang kutsilyo niini.

Tungod sa iyang kahadlok si Cerentas mikaratel og dagan paingon sa kapolisan.

Apan sa pag-responde sa mga polis nagbuy-od na ang biktima sa yuta nga samdan og 13 ka dinunggaban sa naglain- laing bahin sa iyang lawas.

Gihatod dayon kini ngadto sa Balamban District Hospital apan gibalhin kini ngadto sa Vicente Sotto Memorial Medical Center (VSMMC) tungod sa grabeng kahimtang niini.

Gituhoan sa kapolisan nga usa ka paregla ang nahitabo sa biktima ug padayon pa nilang gipangita ang mga criminal karon.