Amahan gibuno sa anak

Dead-on-arrival sa Vicente Sotto Memorial Medical Center ang usa ka amahan human kini gitusak-tusak og dunggab sa iyang kaugalingong anak niadtong Sabado sa alas 5:20 sa hapon.

Giila ang biktima mao si Nicolas Rama Alvez, 68, taga sitio Upper Kawayan, luyo sa TB Pavillion barangay Sambag II ning dakbayan.

Si Alvez, gidunggab patay sa iyang kaugalingong anak nga si Eduardo Alvez, 42, nagpuyo sa nahisgutang lugar ug manindahay diha sa Carbon Public Market.

Sa imbestigasyon nila ni SPO2 Rey Cuyos ug mga kaubanan sa Homicide Section sa Cebu City Police Office ang anak sa biktima nga si Nicolas Alvez Jr., 28, nitug-an nga hubog niadtong higayuna ang iyang maguwang dihang naabot sa ilang panimalay.

Matud pa niini nga gitug-anan sa manghod nga si Albert Alvez ang suspek nga giguba sa ilang amahan ang kahoy nga sawog sa ilang pinuy-anan.

Sa kalagot sa iyang maguwang diha-diha gilayon giatake ang iyang amahan ginamit ang usa ka kutsilyo ug gidunggab makadaghang higayon sa kalawasan.

Gidali unta nila sa VSMMC ang ilang amahan apan gideklarar sa mga doctor nga dead-on-arrival gumikan sa kadaghan sa mga samad dinunggaban nga nadawat niini.