'Gang violence' 1 tipi, 4 angol

Usa ang namatay ug upat ang naangol sa managlahing insidente sa pagpamusil dinhi sa dakbayan sa Sugbu nga pulos gidudahang binuhatan sa mga gang members niadtong miaging gabii ug kagahapon sa kaadlawon.

Namatay pipila ka oras pag-abot sa tambalan ang usa ka 37-anyos nga lalaki human maoy naigo sa bala dihang ang grupo sa mga batan-ong lalaki namusil alas 3:00 sa kaadlawon kagahapon diha sa sulod sa usa sa mga kan-anan sa dalan Mango Avenue ning dakbayan.

Giila ang namatay nga mao si Hermie Sumampong, taga dalan B. Rodriguez, barangay Sambag II human makaangkon og samad pinusilan sa iyang liog.

Sa imbestigasyon sa kapulisan, usa ka Ernest Arombo, 24, cook sa usa sa mga kan-anan sa maong dapit maoy tuyo sa tulo ka mga suspetsadong sila si Jun Loiue Oyao 19, Nicolas Gomes, 26, ug kaubang 17-anyos nga pulos taga dalan Andres Abellana barangay Guadalupe.

Gikatahong ang 17-anyos nga suspek maoy gitumbok nga mipusil kang Arombo apan wala kini maigo ug ang bala adto miigo sa liog ni Sumampong, ang 17-anyos daling naaresto sa mga tawo diha sa sulod.

Matud pa sa kapolisan sa sayo pa niana nakakita og gubot ang mga suspek batok sa laing grupo sa mga kustomer human gibadlong maong nanggawas apan dangtan og pila ka gutlo mibalik nga pulos na armado ug kalit gipusil si Arombo.

Atol na sa kaguliyang nakahigayon og ikyas sila si Oyao ug Gomes apan dunay nakatawag og mga polis ug nahatag ang direksyon nga ilang gidaganan ug silang duha naabtan sa mga mirespondeng sakop sa Mobile Patrol Group diha sa may Redemptorist Church.

Gikatahong imbes nga mutahan nakigpinusilay pa hinuon ngadto nila ni PO3 Joel Taboada ug mga kauban hinungdan nga sila nibawos ug naigo si Oyao sa tuong tiil ug gidala sa CCMC.

Nakuha sa kapolisan gikan sa mga suspek ang usa ka .38 rebolber, tulo ka buhing bala, usa ka kabhang, samtang nakuhaan sa laing armas si Oyao, tulo ka buhing bala, duha ka kabhang sa laing klase sa armas.

Alas 9:45 niadtong   Sabado sa gabii usa ka 13-anyos nga taga Forest Hills, Banawa barangay Guadalupe nga 1st year high school pa sa usa sa mga unibersidad dinhi sa dakbayan.

Usa ka Antonio Maravelez nga nag-abang sa boardinghouse nga gipanag-iya sa usa ka Boy Becada diha sa sitio Palace Side sa barangay Sambag II, maoy nakakaplag sa nagkadugo ug nagbuy-od na nga biktima.

Si Maravelez nitug-an sa mga imbestigador sa kapulisan nga lima ka mga batan-on ang iyang nakit-ang nagdali sa paggawas sa lawak human sa usa ka sipang buto.

Pagkakita niini sa batan-on dali silang mipahibalo sa barangay ug gidali og dala sa Vicente Sotto Memorial Medical Center, gikatahong diha naigo sa ulo ang biktima.

Si SPO4 Alex Dacua sa Homicide Section sa Cebu City Police Office nitug-an sa Banat News nga dili pa usab sila maka kumpirmar kun sakop ba og gang ang biktima, apan si Sambag II Barangay captain Carl Stephen Belermino sa pakighinabi sa Banat News nagkanayon nga estambayan sa Crips Gang ang maong lawak base sa impormasyong ilang nadawat.

Dunay mga pagdudang posibleng nagduwa-duwa ang mga batan-on og armas ug aksidenteng nakablitan ug naigo ang biktima apan si Belermino nagkanayon nga duna sad silay nadunggang dunay nag-away sa sulod ug gituyo ang pagpusil sa biktima.

Narekober sa kapulisan sa crime scene ang usa ka .38 paltik nga revolver, duha ka mga buhing bala, ug usa ka kabhang niini.

Sa lain na usab nga pagpamusil nga gikalambigitan og grupo sa mga batan-on, duha ka lalaki nga giilang sila si Jefferson Guaca, 26, ug Marlon Paloma, 20, nga usa ka 3rd year high school.

Si Guaca naigo diha sa buko-buko nga nilapos sa tiyan ug Marlon Paloma, 20, 3rd year high school nakaangko’g samad pinusilan sa walang suwang, pulos taga Poblacion Oriental Consolacion probinsya sa Sugbu.

Ang duha gipamusil sa lima ka batan-on samtang naglakaw mga alas 4:10 sa kaadlawon kagahapon sa may MJ. Cuenco Ave. F. Villa atubangang bahin sa karaang Cebu Provincial Detention and Rehabilitation Center (CPDRC).

Usa ka Bernard Saraosos 24, higala sa mga biktima nitug-an sa kapulisan nga gikan sila sa disco sa barangay Tejero dihang kalit silang gipauwanan og bala sa lima ka mga batan-on.

Human sa pagpamusil ang mga biktima gidali sa pagdala sa Cebu City Medical Center (CCMC) samtang ang mga suspetsado nisibat agi sa T. Padilla St.

Matud pa ni SPO4 Alex Dacua nga sa pagkakaron dili pa ma-establisar kun may kalambigitan kini sa grupo sa fraternity o mga gangs hinungdan sa pagkakaron ilang gilantaw kini pamaregla ra.

Wa usab nila gisalikway ang posibilidad nga dunay gikabangi ang mga biktima niadtong mga grupo sa mga batan-on ug dihang nakit-an gipamusil