Barbero naghikog tungod sa sakit

Usa ka 68-anyos nga biyudo ang wala na maka-agwanta sa gihambing sakit ang naghikog patay sulod sa ilang pinuy-anan mga alas 6:15 niadtong niaging gabii diha sa Back Rubber World barangay Basak-San Nicholas ning dakbayan.

Ang nagpakamatay giila sa kapolisan nga si Antonio Dalacanog, usa ka barbero kinsa nakit-an nalang sa iyang mga anak diha sulod sa iyang lawak sa ikaduhang andana sa iyang panimalay nga dunay higot sa liog ug nagbitay nga nagluhod.

Matud pa ni SPO4 Alex Dacua imbestigador sa homicide section sa Cebu City Police Office (CCPO) nga ang biktima gikatahong nag-antos sa iyang sakit sa arthritis ug uban pang mga sakit nga maoy gituohan sa iyang paghikog.

Matud niini nga atol sa ilang paghiling sa crime scene ilang nakuha ang pisi nga gigamit sa paghigot sa liog ni Dalacanog apil ang suicide note.

Gikataho nga sa maong suicide note ang naghikog nga si Dalacanog nipadayag nga sa iyang mga anak nga mobiya na siya kay dili na niya maantos pa ang iyang gihambin nga sakit.

Hinuon way nakitang foul play ang kapolisan sa patay'ng lawas sa namatay gawas lang sa lakra sa liog niini agi sa higot sa pisi.