Usa ka pari ang nakalingkawas sa tinong kamatayon apan naangol ang iyang sakristan human mapasok sa trak ang iyang awto nga gi-parked diha sa barangay South Poblacion lungsod sa San Fernando niadtong niaging kadlawon.
Si Rev. Father Kent Martinez 37, taga Tulotulo, Consolacion ug maoy kura paroko sa lungsod sa Moalboal ang nakalingkawas sa kamatayon bisan pa man sa pagkaguba sa iyang Sedan GTV-973 nga napasok sa luyong bahin sa Fuzo truck nga may plakang GAQ-160 nga gipang-iya sa Zeon Construction nakabase sa Zamboanga City.
Apan ang iyang sakristan nga si Alvin Redoble, 19, maoy nakaangkon og kadaut diha sa iyang ulo.
Si SPO2 Joel Nebrija sa San Fernando Police Station nga gikahinabi sa Banat News nagkanayon nga kusog ang dagan sa pari mga alas 4:40 niadtong niaging kaadlawon ug wala mabantayi ang gi-parked nga naaberyang trak gumikan kay walay gibutang nga early warning device.
Daling gidala sa tambalanan ang naangol nga si Redoble ngadto sa South General Hospital diha sa dakbayan sa Naga.
Samtang ang driver sa Fuzo truck nga si Joseph Tyorang ang gi-release sa kapulisan ug ang trak lang maoy gi-hold sa pagkakaron.