Mananagat natagak sa pumpboat patay

Patay ang usa ka mananagat nga natagak gikan sa giluwanan niining pumpboat atol sa iyang pagpanagat sa kadagatan sa barangay Catarman sa lungsod sa Cordova niadtong miaging adlaw.

Ang namatay giila ni SPO2 Llovero Agosto nga si Emelino Angco Pugoy, 24-anyos, minyo, nagpuyo sa maong dapit.

Matud pa ni SPO2 Agosto nga kuyog sa biktima sa pagpanagat ang laing mananagat nga si Garciano Petaliar, hingkod ang panuigon nga iyang silingan.

Si Petaliar nga ilang gisukit-sukit mitug-an nga atol sa ilang pagpanagat sa maong dapit maoy iyang namatikdan nga natagak ang biktima ngadto sa kadagatan.

Naglisud sa paglangoy ang biktima alang sa pagbalik og sakay sa ilang giluwanan nga pumpboat nga maoy hinungdan nga dali kini niyang gitabang apan nawad-an kini sa panimuot.

Dali nga gidala ang biktima sa Lapu-Lapu City District Hospital apan gideklarar kini sa doktor nga nag-atiman nga patay na kining nahidangat sa maong tambalanan.