Usa ka driver ang nalandig sa Cebu City Medical Center (CCMC) human dunggaba sa silingan niining usa ka ex-convict sa miaging gabii diha sa sitio Lower Villa Zacate, barangay Basak-Pardo ning dakbayan.
Ang biktima giila sa kapulisan nga si Roy Francis Valencia, 43, residente sa nahisgutang lugar samtang ang suspetsado giilang si Jaime Espinosa, hingkod ang panuigon.
Ang biktima nakaangkon og samad dinunggaban sa ubos nga bahin sa iyang walang dughan gikan sa “ice pick” nga maoy gigamit sa suspetsado.
Sa imbestigasyon nila ni SPO1 Rogelio Nedamo ug mga kaubanan sa Homicide Section sa Cebu City Police Office ang biktima igo lang niuwang sa iyang mga silingan ug suspect nga niadtong higayuna nagkalalis.
Matud pa nga ang suspetsadong si Espinosa hubog kining naabot sa panimalay sa biktima diin usa ka silingan ug kabanay sa biktima nga si Marilyn Valencia ang mitambag niini nga mopauli na.
Apan gikasuko kini sa suspetsado nga niresulta sa panaglalis tali ni Marilyn, ang biktima nga niuwang unta sa duha aron sa pagpa-kalma sa sitwasyon.
Apan sa kalit lang nilanit sa gisuksok nga ice pick ang suspek ug gihansakan makadaghang higayon ang biktima, laing silingan nilang ginganlan og Fernando Paraiso Jr. ang nitukmod sa suspetsado.
Ang biktima nakaangkon og samad dinunggaban sa iyang walang dughan gidali sa pagdala ngadto sa tambalanan samtang ang suspetsado daling nisibat.