Police auxiliaries  pormahan sa PNP

Nagplano ang kadagkoan sa Philippine National Police sa pagtukod og police auxiliary force aron makatabang sa kahapsay ug kalinaw sa komunidad.

Si outgoing PNP Director Avelino Razon, Jr. sa pagbisita niini dinhi sa Sugbu niadtong milabay’ng adlaw atol sa selebrasyon sa ika-18 ka katuigan sa PNP mibutyag nga dako og matabang ang police auxiliaries sa regular nga law enforcers.

Ang PNP una nang nipadala og 1,000 ka shotguns ngadto sa Mindanao aron iapod ngadto sa mga komunidad nga diin mag-operate ang mga rebeldeng Moro Islamic Liberation Front alang sa ilang proteksyon.

Dunay dugang 12,000 nga susamang mga armas ang gilaraw nga iapod-apod sa mga rehiyon sa nasud aron pahuptan sa mga residente aron magamit sa pagpanalipod sa ilang kaugalingon ug mamentinar ang kahapsay ug kalinaw sa ilang mga dapit.

Miklaro hinuon si Razon nga di basta lang kini iapod sa mga tanod o ni bisan kinsa, pilion ra ang mga tanod, mga miyembro sa anti-crime volunteers, indibidwal nga may maayong record, di badlungon sa ilang komunidad ug kadtong mga tawong gusto og kalinaw sa ilang dapit.

Ang mga isyuhan sa maong mga armas moagi og higpit nga screening ug training paghupot niini aron dili kini mapunta sa mga badlungong gusto lang magpa-polis polis.

Daan nang nahimong isyu sa dakbayan sa Sugbu ug may mga barangay kapitan nang miawhag nga tugutang armasan ang ilang mga tanod gumikan kay ang mga badlungon sagad armado usab ug ang mga tanod batuta ra.

Alang sa kapolisan dinhi sa lalawigan kadto rang mga tawong angayan ug makapasar sa higpit nga screening nga proseso maoy hatagan sa maong mga armas.

Matud pang Razon ang police auxiliaries nga tukoron langkuban sa mga piniling tanod, anti-crime volunteers, talahurong indibidwal, mga communication volunteers ug uban pa, apan silang tanan ipailawom sa superbisyon sa lokal nga PNP.

Ang lakang sa PNP sa pagpadala og armas didto sa Mindanao gisaway dayon sa pipila ka mga sector nga nabalakang gamiton hinuon kini sa binuang ug mas mosamot pa ang kagubot   sa maong lugar.