Tanod mipatay sa nagpaabot sa husay

Gidunggab patay ang usa ka lalaki sa usa ka tanod ug gitabangan pa gyud og kulata sa mga estambay samtang nagpaabot unta ang biktima sa schedule sa husay sa kaso niini sa barangay hall sa barangay Catarman lungsod sa Cordova alas 7:20 niadtong Huwebes sa gabii.

Dead on arrival (DOA) sa Lapulapu District Hospital si Lee Potot, 37, molupyo sa Talamban siyudad sa Sugbo human kini dunggaba sa tanod nga si Crispin Pinute sa nahisgutang barangay inabagan sa wala pa mailhing mga batan-ong estambay.

Matod ni PO3 Rolando Tagsip ang biktima nag-estambay sulod sa perimeter fence sa barangay hall ug nakig-estorya ni kagawad Rolando Escabas samtang nagpaabot sa husay nila sa barangay tali sa iyang asawa ug sa mga gikakontra niini nga sila si Ray Casquejo ug Carlota Largo.

Apan sa tanto nga panag-estorya gikatahong kalit lang nibuhi og pamahayag ang biktima nga nagkanayon “inyo ning barangay, inyo ning kapitan” ug gipangwakli ang mga tawo nga buot mopakalma kaniya.

Giingong pagkakita sa biktima sa tanod kalit niya kining gisukmag hinungdan nga nibunot og kutsilyo ang suspek ug gidiretso og dunggab ang biktima.

Ang mga estambay diha sa duol niambit sad og kulata sa biktima hangtud nga kini nalup-og.

Si PO2 Calixto Butantan nga usa sa nirespondi maoy nihatod sa biktima paingon sa tambalanan apan gideklarar kining dead on arrival.

Matod ni PO2 Butantan upat ka samad dinunggaban sa walang bahin sa ilok ang na-angkon sa biktima wala pay labot sa mga bukol sa nawong nga gituohang agi sa pagpangulata sa nitabang nga mga estambay.

Ang mga suspek daling nisibat human sa hitabo ug hangtud karon padayun pang gipangita sa kapulisan, nasayran sa nahipos nga impormasyon sa kapulisan nga ex-convict si Pinute.

Nasayran usab nga duna nay daang may kaligotgot ang suspek ngadto sa biktima human kay nasagpaan   niini pipila ka mga bulan na ang nilabay.