Asawa sa PAF crew dili pa ‘kadawat

Mga kabanay sa mga crew sa C-130 di pa una modawat sa mga benipisyo gikan sa gobiyerno ug bisan na sa ubang pribadong sector tungod kay malaumon pa gihapon silang buhi pa ang ilang mga mahal sa kinabuhi.

Ang C-130 Hercules Transport aircraft sa Philippine Air Force nahagsa pipila ka minutos human mobiya sa Davao Airport ug nasigpatang mitidlom diha sa kadagatan sa Samal Island sa Davao.

Si Jacklyn Areola asawa ni SSgt. John “Junjun” Areola, usa sa mga crew sa C-130 mitug-an nga dili una siya modawat sa maong mga hinabang.

Ang Provincial Government ug PAF mitanyag na nga mohatag og hinabang ug uban pang mga benepisyo sa tagsa-tagsa ka mga crew nga hangtud karon missing pa gihapon.

Matud pa ni Areola sama ra sa iya nang nadawat nga patay na ang iyang bana kung iyang dawaton dayon ang maong kantidad, gani siya ug ang iyang lima ka mga anak malaomon pa gihapon kini nga buhi pa ang ilang amahan.

Sa matag abyon nga motugpa sa Mactan Benito Ebuen Air Base, sila  nanghinaut nga si SSgt. Areola luwan sa maong abyon ug mopauli na sa ilang panimalay.

Midugang si Jacklyn nga daan na nga adunay tilimad-on nga giluwatan nga mga pulong ang bana sa wala pa kini mobiya sa ilang panimalay.

Gumikan kay nanugon kini kaniya nga kung unsay mahitabo dili siya magpalubong sa kaulohan o sa Pangasinan ug gusto siyang dinhi sa Sugbu dad-on ang iyang lawas.

Lakip sa gikatahong gipanugon sa bana mao ang pag-atiman og maayo sa ilang mga anak diin wala masayod si Jacklyn nga mao na diay kadto ang katapusang mensahe kaniya sa iyang bana.

Samtang sa problema nga ilang gipasupot ngadto sa mga kadagkuan sa PAF mao ang ilang padayong pagpuyo sa MBEAB ug ang kaugmaon sa ilang mga anak nanghinaut kini nga mahatagan og igong pagtagad sa gobiyerno.