Unom ka lawas gikuhaa’g DNA sample sa NBI

Dili kabahin sa nalunod nga Princess of the Stars nga barko ang unom ka mga patay’ng lawas nga gi-exhumed niadtong niaging adlaw sa mga eksperto sa National Bureau of Investigation (NBI) sa lungsod sa Sta. Fe ug Madridejos Isla sa Bantayan.

Kini maoy giklaro ni NBI-7 medico legal officer Dr. Rene Cam kinsa maoy nangulo sa pag-exhume sa maong mga patay’ng lawas uban nila ni Department of Health (DOH) Dr. Christopher Samson, Cebu Provincial Police Office (CCPO) deputy director Supt. Erson Digal.

Matud pa ni Cam nga layo na kaayo ang posibilidad nga ang unom ka mga na- exhume gikan sa Princess of the Stars didto sa Romblon tungod sa gilay-on niini.

Nagtoo hinuon ang mga awtoridad nga kabahin kini sa mga nabiktima sa pag-igo sa bagyong Frank diin daghang mga fishing boats diha sa Isla sa Bantayan ug kasikbit nga lugar ang nalunod.

Ang grupo ni Cam nikubkob sa mga lawas diha sa isla sa Kinatarkan sa Sta. Fe nga naglangkob sa barangay Hagdan, Langob, ug Kinatarkan-Bitoon diin ang maong mga patay’ng lawas nga nangadugta na dihang nabangalan sa kabaybayunan gilubong dayon sa mga residente.

Gikuhaan og post mortem samples ang mga patay’ng lawas aron ilang ipadala sa Sarajevo alang sa processing sa DNA tungod kay di na sila mailhan gumikan sa kadugta na sa mga lawas. Dunay usa sa mga patay ang gitug-an sa mga residente nga may nakuhang dakong bulawang singsing.

Si Samson miingon nga adunay 30 ka mga residente sa maong lugar ang ilang nakuhaan sa blood samples alang na sa DNA crossmatchings tungod kay diha sa Kinatarkan may pito ka mga kabanay ang nawad-an og kabanay ug 20 ka mga tawo  sa Madridejos ang mipresentar usab nga may na-missing nilang kabanay sa bagyo.

Sa iyang bahin si barangay kapitan Wilma Dawa sa barangay Hagdan mibutyag nga aduna pay 15 nila ka mga residente ang pabiling missing human sa duha na ka bulang nilabay  pag-igo sa bagyong Frank.

Sumala pa niini nga sagad sa maong nanga- missing mga mananagat diin ang mga fishing boats niini nalunod diha sa kadagatan sa tunga-tunga sa Bantayan Island ug Negros Occidental.