Crew sa C-130 makadawat benepisyo

Kapin sa P500 mil  ang ihatag ni Presidente Gloria  Arroyo ug sa Philippine Air Force ngadto sa mga kabanay sa mga nangamatay sa pagkahagsa sa C-130 sa Davao.

Si PAF Commanding General Lt. Gen. Pedrito Cadungog nga personal nga nakighinabi sa mga kabanay sa mga nabiktima mipasabot nga dili angay mabalaka gumikan kay padayon ang ilang search and retrieval operation bisan pa sa kalawom sa maong dapit.

Matod pa ni Cadungog nga si Arroyo mohatag og hinabang balor P250 mil ka pesos matag pamilya, samtang ang PAF base sa ilang lagda makadawat kini og P100 mil.

Lakip sa mahatag nga benipisyo mao ang paghatag sa unom ka bulan nga suhulan ug uban pang mga benipisyo nga madawat sa mga kabanay niini.

Ang mga kapikas sa kinabuhi sa mga biktima nabalaka sa ilang sitwasyon karon sa ilang pagpuyo sud sa MBAEB gumikan kay wala na ang ilang mga bana ug ang problema sa pagpahuman sa pagtoon sa ilang mga anak.

Mipasalig hinuon si Cadungog ilang tukion ang maong mga yangungo uban sa Presidente sa nasud.

Giangkon ni Cadungog nga gumikan sa kalawom sa kadagatan diin mahagsa ang maong abyon malisod na pagkuha ang mga patay’ng lawas nila ni Maj. Manuel Zambrano (piloto) lumad sa Nueva Ecija. Capt. Adrian de Dios (co-pilot) nga lumad sa 1121 Magsaysay St. Catarman, Samar.

Samtang ang mga crew niini nga sila TSgt. Enrique Lobregas nagpuyo sa MBEAB Lapulapu City; SSgt. John Areola sa MBEAB; SSgt. Aldrin Ilustrisimo residente sa Soong, Mactan dakbayan sa Lapulapu; SSgt. Felix Pedro Patriarca sa MBEAB; SSgt. Patricio Claur, lumad sa Sabang, Danao City; SSgt. Petronilo Fernandez sa MBEAB ug si SSgt. Gary Diñoso nga nagpuyo sa Basak dakbayan sa Lapulapu.

Usa nalang karon ang fully operational nga C-130 sa PAF apan gumikan sa insidente grounded una kini hangtud di pa mahuman ang imbestigasyon.