Napisat ang ulo sa usa ka 20-anyos nga lalaki human maligsi sa schoolbus sa usa ka unibersidad alas 3:05 kagahapon sa hapon diha sa taytayan sa South Road Property (SRP).
Si PO1 Dionisio Gallo, traffic investigator sa Cebu City Traffic Division sa pakighinabi sa Banat News niila sa namatay nga si Roberto Amar, 20, taga barangay Lipata, Minglanilla sakay sa motorsiklo padulong sa Cebu City.
Samtang ang nakadasmag kaniya mao ang driver sa school bus nga si Arcadio Yaot, 60, taga barangay Nunok dakbayan sa Talisay.
Matud pa ni PO1 Gallo base sa gitug-an ni Yaot nitupad niya ang motorsiklo samtang sila nagdagan padulong sa direksyon sa Cebu City apan kalit lang kining mi-overtake kaniya apan sa tunga-tungang bahin sa taytayan adunay sign board nga gibutang nga “slow down” ug didto nasangit ang motorsiklo.
Pagsarasay sa motorsiklo didto kini miigo sa kilid sa iyang gimanehong school bus ug gumikan sa kakusog nalagpot ang drayber sa motor gibana-banang unom ka metros ug nababag ang motor.
Apan sa paglihay sa bus sa tuo wala niya mabantayi nga didto diay nalagpot ang biktima ug nalatayan sa luyong bahin nga ligid ang ulo niini nga maoy nakaingon sa hinanaling kamatayon niini.