2 nanulis, namusil 'sikop

Duha ka tawo nga gitumbok nga mitulis ug mipusil sa taxi driver sa Purok Saging, barangay Gun-ob, dakbayan sa Lapulapu sa miaging gabii ang nadakpan sa sulod sa gitagoan gibana-banang 50 metros gikan sa crime scene.

Ang nadakpan mao sila si Aleodeon Tawatawa Volmar, 26, nagpuyo sa Gun-ob ug Bao Ampaso, 27, nga taga Saac, Buaya, dakbayan sa Lapulapu ug pulos lumad nga taga dakbayan sa Marawi, Lanao del Sur.

Ang duha gitumbok nga maoy nitulis kang Luciano Panogaling Boro, 51, taga Punod, Pinamungahan ug drayber sa BNM taxi nga nagdala sa plate number nga GVV 135.

Nasakmit sa kapolisan ang armas nga .9mm nga walay magazine nga napalgan sa sulod sa taxi sa biktima nga gituohang natagak dihang nakig-ilog si Boro sa maong hinagiban.

Si PO3 Joseph Damasco nga nahinabi sa Banat News miingon nga nisakay ang mga suspek gikan sa Mandaue ug nagpahatod sa Gun-ob, dakbayan sa Lapulapu.

Apan sa paghidangat sa maong dapit mideklarar sila og tulis apan ang biktima nisukol hinungdan nga kini gipusil.

Ang biktima nga nakabaton og samad pinusilan sa iyang ilong nga milapos sa aping ug samad pinusilan  sa wala niyang bukton gidala sa Chong Hua Hospital sa dakbayan sa Sugbo.

Walay swerte ang mga suspek kay natultulan sa mga polis ang ilang gitagoan hinungdan sa ilang pagkasikop.