Mga adik di na mogamit og shabu?

Napanglantawan karon ni Cebu City Councilor Agustus Pe Jr., nga mubalhin paggamit sa laing drugas ang mga drug addict dinhi sa siyudad.

Kini tungod sa giingong padayong pagsaka sa presyo sa shabu nga maoy nag-unang gamitonon sa mga adis-adis sa dakbayan.

Matud ni Konsehal Pe nga basi sa ilang nadawat nga intelligence report, muabot na sa P80 mil ang presyo karon sa usa ka bulto (5grams) sa shabu.

P500 na usab ang presyo sa usa ka deck sa shabu nga gihulagway sa konsehal nga mga adunahang drug user na lang ang makaabot sa maong presyo.

Matud ni Pe nga kung ang “supply and demand” ang basihan, klarong niminos o nagnihit na ang supply sa shabu dinhi sa Sugbu.

Kini tungod usab sa giingong walay hunong nga operasyon sa kapulisan ug sa ubang law enforcement unit sama sa Philippine Drug Enforcement Agency.

Tungod niini nagtoo si Konsehal Pe nga mubalhin paggamit sa laing drugas ang mga drug user nga dili na makaabot pagpalit og shabu.

Ang nubain ug marijuana maoy gituohan sa konsehal nga ihulip sa mga adis-adis sa shabu nga gamiton sa ilang bisyo.

“Mahal na man kaayo ang shabu, so, atong nakita ang nubain ug marijuana nga mao nay gamiton sa mga adis-adis kay bubarato,” sumala ni Pe.

Ang konsehal nga co-chairman usab sa Cebu City Anti-Drug Abuse Council (CADAC) miingon hinuon nga sila duna nay lakang nga himuon niini.

“Kining kakuwang sa shabu, expected nga musaka ang mugamit sa nubain ug sa marijuana, so, mao na nga i-intensify pud nato ang intelligence operations dihang dapita,”dugang pamahayag ni Konsehal Pe.

Nasayran sa konsehal nga ang nubain nga usa ka regulated drugs mahimong mapalit diha sa barangay Kamagayan ning dakbayan.

Apan kini giingong libre usab nga mapalit sa kasikbit nga mga dapit sa siyudad sama sa dakbayan sa Mandaue.

Samtang ang marijuana miingon si Konsehal Pe nga mahimong mapalit usab sa bisan asa nga barangay sa siyudad sa Sugbu.

Apan gipasalig sa konsehal nga dili sila mulugak sa ilang kampanya pagsumpo sa problema sa ginadiling drugas dinhi sa dakbayan.