Way legal basis si Granada–Noval

Nipagawas og kamanduan ang Department of Interior and Local Government (DILG) central office nga walay legal nga basehan nga molingkod si Demetrio Granada isip mayor sa lungsod sa Tudela isla sa Camotes.

Sa duha ka pahinang notisya sa DILG nga gipagawas ni Regional Director Pedro Noval Jr. nagkanayon nga wala sa desisyon sa Regional Trial Court RTC ang “writ of execution pending appeal” kundili kadto palang pag-grant sa Motion for Execution pending appeal”nga gipagawas ug nagdeklarar ni Granada nga maoy nidaog sa piniliay niadtong milabay'ng Mayo 14, 2007.

Matud pa sa DILG-7 giduso na ngadto sa Commission on Election (COMELEC) ang records kabahin sa maong isyu hinungdan nga ang korte nawad-an na og hurisdiksyon pag-isyu og Writ of Execution niadtong tungura.

“It is only the Writ of Execution Pending Appeal issued in accordance with the order of the court that can give legal basis for the assumption of Mr. Granada as Mayor of Tudela. There being none issued by the court, Mr. Granada has no legal basis to assume office,”dugang pasabot sa DILG-7.

Ang Sangguniang Bayan ug Liga ng mga Barangay kinsa nipasar og resolusyon sa konseho nga nag-ila kang Granada isip mayor gihulagway usab sa DILG-7 nga walay bili ug hayan makwestyon usab sila tungod sa paglapas nila sa prinsipyo sa “separation of powers.”

Si Rogelio Bacquerfo kinsa nibisita sa buhatan ni CPPO Director Sr. Supt. Carmelo Valmoria  aron lang hatagan og kopya sa DILG ang naulahi mipadayag nga andam na siyang molingkod isip mayor sa lungsod.

“Two days from now adto na gyud ko didto sa Tudela aron molingkod pagka mayor, di nako mosugot ana karon naa  nay order sa DILG, siyaro di’ sila makasabot (Granada) 2 months na si Granada nga nilingkod naka enjoy na seguro siya,” matud pang Bacquerfo sa mga tigbalita kagahapon.

Apan nitataw siya nga sa dili pa siya molingkod isip mayor sa maong lungsod iyang panghatagan og kopya si Granada ug tanang mga empleyado niini aron sa ingon wala na unyay babag sa iyang paglingkod isip mayor.

Nibahad si Bacquerfo ni bisan kinsa nga mosupak ug magmagahi sa pagpahawa sa munisipyo ipadakop niya. Si Valmoria sa iyang bahin nagkanayon nga iya  pang ikunsulta sa DILG-7 ang maong desisyon.