Fratman  namusil

Gikatakdang pasakaan og kasong attempted homicide karong adlawa ang usa ka sakop sa Tau Gamma fraternity nga nadakpan tungod sa pagpusil sa  duha ka mga lalaki niadtong Domingo sa kaadlawon sa sitio Panog, barangay Magdugo dakbayan sa Toledo.

Nagtingkagol na sa karsel si Florensio Padernal Jr., 18, nagpuyo sa nahisgutang lugar nga giingong sakop sa maong fraternity.

Samtang giila ang mga biktima mao sila si Bhorgia Dionne Climaco, 19, nakaangkon og samad pinusilan sa tuong dunggan nga nilapos sa tangkugo ug usa ka 17-anyos nga lalaki kinsa nakaangkon og samad sa luyong bahin sa ulo, ang mga biktima pulos taga Proper Magdugo.

Si PO2 Edmund Liston sa Toledo City Police nitug-an sa Banat News padulong na unta mamauli ang duha sa ilang panimalay gikan sa disco sa sitio Panog uban sa ilang mga silingan.

Dihang ang suspetsadong si Padernal kalit lang niduol sa iyang amigo nga si Renel Adarne ug gikomprontase kini labot sa ilang karaang panagbangi nga niresulta sa panaglalis.

Diha-diha usa sa mga kauban sa suspetsado nga wala mailhi ang kalit lang nisukmag kang Adarne hinungdan nga ang duha ka mga biktima niuwang unta niini.

Apan kalit lang nibunot si Padernal og armas ug gipamusil ang duha dayon sibat apan nadakpan atol sa hot-pursuit sa kapulisan.