59-anyos nalumos

Posibleng giatake sa kasingkasing ang usa ka 59-anyos nga lalaking gituuhang nalumos diha sa Carancho Beach Resort sa barangay Maribago dakbayan sa Lapulapu sa milabay'ng hapon.

Ang nalumos mao si Eduardo Gallardo, 59, taga V. Rama Ave. dakbayan sa Sugbu.

 Sa imbestigasyon ni PO3 Manolito Abellanosa sa Homicide Section sa Lapulapu nasuta nga samtang naligo ang biktima sa maong resort sa taga-hawak nga tubig dihang kalit kini nga mikisikisi.

Nagtuo ang mga kaparyentihan nga nagkomedya lang ang ilang apohan apan dihang mitidlom kini dali nila kining gitabang ug mitawag og  ERUF ug gidala sa Mactan Doctors hospital apan gideklarar kini nga dead on arrival.

Matod pa ni Abellanosa nga posibleng may sakit ang biktima ug giatake kini niadtong tungura.