Dinakpan Gipuspusan Sa Polis

Duha sa tulo ka mga dinakpan sa kapulisan sa dakbayan sa Sugbu ang nireklamong gipuspusan og extension sa lingkuranan niadtong milabayng Sabado sa hapon tungod sa pasangil nga siya ug iyang mga kauban ang tigpalusot og ‘shabu’ diha sa Cebu City Jail sa barangay Kalunasan.

Ang mireklamo giilang si Joseph Tabada, taga-Yellow Ville sa barangay Kalunasan kinsa uban sa iyang mga higalang sila si Isidro Llanos  ug Gil Tampus, 43, pulos taga Stone Hills, barangay Kalunasan gidakop niadtong Sabado tungod sa kalapasan sa City Ordinance 1219 kon Anti-Dispatching and Car Watching.

Si Tabada nitug-an sa Banat News nga gi-imbitar ra sila sa mga sakop sa Criminal Investigation and Intelligence Branch apan dihang sila nag-atubang gipangutana siya ni Sr. Insp. George Ylanan kabahin sa mga palusot og shabu sa mga   modalaw sa maong bilanggoan apan nangatarungan siya nga wala siya'y nasayran niini.

Apan gikatahong mibanghag ang maong opisyal ug nikuha’g bangko dayong hapos niini ngadto sa iyang ulo, lakip si Tampus mipasangil kang Ylanan nga siya gibunalan niini og logbook.

Matud pa niini, iyang panginabuhi ang pagbantay sa mga butang nga ibilin sa modalaw sa mga priso diha sa City Jail sama sa cellphone, kuwarta ug uban pa sa bayad nga P10 matag butang.

Dugang pa niya niadtong Biyernes sa buntag dunay jailguard sa City Jail nga giingong sinugo sa iyang opisyal aron ipakuha ang cellphone sa usa ka babayeng ginganla’g Glyne.

Gipanghimakak niini nga adunay dakong plastic sa putos nga gibilin sa iyang possession niadtong Biyernes ug siya midugang nga kaniadto pa ang mga jailguards gyud maoy naandan niyang mokuha sa mga gibiling gamit  sa mga dalaw.

Si Tabada uban kang Llanos ug Tampus kasamtangan gitanggong sa karsel sa kapulisan sa dakbayan sa Sugbu samtang ipasaka pa ang tukmang kaso batok kanila.

Apan si Ylanan dihang gihinabi sa Banat News mihimakak sa pasangil nga iyang gidagmalan ang mga dinakpan ug kini tumo-tumo ra.

Matud pang Ylanan nga dunay mas lawom nga operasyon silang gihimo niadtong mga tungura may labot sa smuggling og mga kontrabando sulod sa maong bilanggoan ug ang Jail Warden nga si Supt. Efren Nemeño ug City Hall nasayod niini.

“The operation is in coordination with the jail warden and the city government to eradicate smuggling of contrabands inside the jail especially drugs, cellphones and among others,” asoy pang Ylanan.

Apan gumikan sa nahitabo posibleng nabantayan na kini sa mga nalambigit apan ipadayon sa CIIB ug jailwarden ang ilang operasyon ug imbestigasyon nga maglangkob unya sa mga jailguards ug apil na ang mga Barangay Intelligence Networks nga nadestino.

Kahinumduman nga gisaway og maayo ni Bise Mayor Michael Rama si Nemeño tungod sa resulta sa mga greyhound operation niini nga diin mga drug paraphernalia ray ilang makuha ug walay shabu, kini tungod kay alang kang Rama di mahitabong may drug paraphernalia nga makuha kung walay shabu nga gamiton diha sa maong bilanggoan.