Most wanted Carcar ‘sikop

Nasusama og salida sa sine ang nahitabo kagahapon sa buntag hangtud na sa hapon sa dakbayan sa Carcar human usa ka most wanted sa maong lugar ang na-corner sa kapulisan ug nitahan human sa pipila ka oras nga negosasyon.

Si PO1 Renedo Villaraiz sa Carcar Police Station nga gikahinabi sa Banat News nagkanayon nga niabot og upat ka oras nga negosasyon una pa ni-surrender ang most wanted nga si Ryan Saducas, 23, taga barangay Liburon sa nahisgutang dakbayan.

Si Saducas nasikop sa kapulisan sa Carcar pinasikad gikan sa upat ka mga warrant of arrest sa kasong murder nga giisyu ni Judge Generosa Labra sa branch 23 sa Regional Trial Court, Attempted Murder nga giisyu ni Judge Estela Alma Singco sa RTC 12; kasong Homicide nga giisyu ni Judge Bienvenido Saniel sa RTC 20; Grave Threats nga giisyu ni Judge Grace Ypil.

Matud pa ni  Villaraiz nga mga alas 11:30 sa buntag dunay concerned citizens nga mitawag sa ilang buhatan nga nakakita sa presensya ni Saducas nga nag-inom gawas sa panimalay sa ginganlan og Berting Bacon nga nahimutang sa Del Corro St., barangay Poblacion 1.

Gikatahong nag-inom si Saducas uban sa iyang mga higala niadtong higayuna dihang gilusob sa kapulisan sa Carcar ug gi-sirkulohan ang panimalay.

Sumala pa ni  Villaraiz nga dihang nakakita si Saducas  ug kaubanan sa presensya sa mga polis nag-iyahay sa pagsulod sa panimalay ni Berting ug wala na gayud mogawas pa.

Hinungdan nga naglisod sila sa pagsulod gumikan kay dili mosugot ang tagbalay nga sudlon kini kun wala silay search warrant.

Nunot sa maong hitabo ang mga residente sa maong dapit ang naukay gumikan kay nahiabot sa punto nga dili gyud ipagawas sa tagbalay si Saducas.

Si SPO1 Villaraiz nagkanayon nga dangog ug most wanted sa ilang dakbayan ang suspek ug nalambigit sa mga dagkong krimen lakip na sa nahitabong drive-by shooting sa sitio Centro ug sitio Lumboy barangay Liburon diin tulo ang patay ug usa ang naangol.

Gipadayag niini nga adunay mga tawo o kontak nga drug lord ang suspetsado hinungdan nga lisod kaayong madakpan ug sagad sa pagpatay nga gibasol kaniya naglambigit gyud sa drogas.