Orihinal nga opisyal sa MCC wa matarog

Nagpabilin nga wala matarog ang orihinal nga Mandaue City College (MCC)  sa Eversely Child Sanitarium sa barangay Jagobiao,  dakbayan sa Mandaue bisan pa sa giingong  mga  kalapasan niini.

Si Dr. Vic Duran, tigpamaba sa maong tulonghaan miingon nga ang  gipagawas nga inbentaryo sa komite nga gipangulohan ni Commission on Higher Education (CHED) Deputy Director Dr. Josefino Ronquillo wala sa katarungan.

Kini tungod kay matud pa niya nga  ang katungdanan sa CHED mao ang pagsuperbisar sa mga paagi sa pagpadagan sa eskuylahan ug dili sa  pagsubay sa mga ekipo ug mga butang niini tungod kay trabaho kana sa Commission on Audit (COA).

Si Duran miingon nga ang gitanyag nga mga subject sa MCC nga gidumala ni Dr. Paulus Cañete pulos nahilatid sa usa ka ordinansa.

Dugang pa niya nga si Dr. Cañete nakapabarog sa tulunghaan nga gihugopan sa pagtungha sa kabus nga kabataan luyo sa kapakyas sa lokal nga kagamhanan sa paghatag og suportang pinansyal niini.

Gitataw ni  Duran nga tin-aw kaayo sa  ordinansa nga nag-umol sa orihinal nga MCC nga ang lokal nga kagamhanan sa dakbayan may dakong responsibilidad sa paggahin og salapi alang sa pagpadagan sa maong tulunghaan apan wala kini tumana sa hingtungdan.