Sugyot ni Empaces tun-an – Daluz

Tun-an pa sa Committee on Budget and Finance sa konseho sa siyudad sa Sugbu ang gisugyot ni City Treasurer Renee Empaces nga mangayo og business permit ang nagkadaiyang mall operator ug ubang commercial building owner sa siyudad ngadto sa moabang og espasyo sa ilang edipisyo sa dili pa tugotang makasugod sa patigayon o negosyo niini.

Sa samang higayon, kung ang lessee gusto na nga mo-terminate sa ilang kontrata tali sa nanag-iya sa building, buot ni Empaces nga kini pangayoan sa lessor og tax clearance ug retirement certificate gikan sa City Hall.

Apan matud sa chairman sa Committee on Budget and Finance sa City Council nga si Konsehal Joey Daluz, nasukwahi ang sugyot ni Empaces sa kasamtangang gipatuman sa siyudad pagpangolekta og buhis.
Miingon si Daluz nga ang kasamtangang gipatuman sa dakbayan  mao ang panginahanglan nga lease agreement tali, sa   negosyanteng mangangabang ug sa tag-iya sa mall, kay dili man mahatagan og business permit ang usa ka business entity kung walay kontrata sa building owner.

Gipadayag hinoon sa konsehal nga ilang tun-an kung unsaon nila pagtabang ang City Treasurer’s Office aron mas mahimong epektibo ang pagpangulekta niini og buhis ngadto sa mga magpapatigayon sa dakbayan.