Engine room sa mall niulbo; .5M ang danyos

Nikabat sa tunga sa milyon ka pesos ang gibiling danyos sa sunog nga niigo sa engine room sa usa ka dakong mall sa uptown ning dakbayan sayo kagahapon sa buntag.

Naukay ang mga empleyado ug mga kustomer sa maong mall dihang kalit nga nibuto ang usa sa mga ekipo sulod sa engine room diin mahimutang ang generator diha sa ikatulong roof deck sa maong establisamento.

Ang alarma nadawat sa kabomberuhan mga alas 10:55 ug gibutang sa first alarm ug duha ka firetrucks sa Cebu City Fire Department ang niresponde.

Apan wala na kini makapasirit og tubig gumikan kay napalong lang kini pipila ka minutos sa mga kawani sa maong tindahan ginamit ang ilang mga fire extinguishers.

Si Cebu City fire investigator SFO2 Joveto Abelgas kalit lang nibuto ang usa sa mga ekipo sulod sa maong generator nga nag-supply sa kuryente sa annex building nga gitukod sa maong tindahan.

Ubos sa maong andana nahimutang usab ang mga tindahan ingon man kan-anan nga nag-abang sa maong mall hinungdan nga dihang nibuto nagkaguliyang ang mga tawo ug naglumbaanay og panggawas.

Anha lang sila napakalma dihang ipahibalo sa mga gwardiya nga ang engine room maoy nibuto, gisusi pa karon sa fire investigators kung unsay nakaingon niini.