RMG-7 sa Mindanao gikabalaka sa asawa

Ang hepe sa Police Regional Office (PRO-7) Chief Supt. Ronald Roderos miawhag sa mga asawa sa Regional Mobile Group (RMG-7) nga dili mabalaka sa ilang mga bana nga gipadala ngadto sa Mindanao.

Matud pa ni Roderos nga walay angayang kabalak-an ang mga asawa sa ilang mga bana tungod kay wala kini idestino sa peligrong dapit sa panggubatan.

Miingon si Roderos  nga tua kini idestino  sa nagkalainlang dapit  sa Mindanao isip  suportang puwersa sa mga sundawo  nga maoy nakigharong sa mga rebelding Muslim sa mga kalasangan.

Gipasalig ni Roderos nga gaan ra kaayo ang trabaho sa kapolisan didto kay igo lang tigbantay sa mga  check point, didto sa South Cotabato aron  pagmintenar sa kahapsay ug kalinaw.

Midugang si Roderos nga kining  tanan kabahin  gihapon sa matawag nga “professional hazard” sa trabaho sa usa ka police.

Iyang gipasabot nga  si PNP chief Avelino Razon Jr. mao ray makabuot kun kanus-a makabalik nganhi sa Sugbu ang mga sakop sa  RMG-7 nga gidestino  sa Mindanao.

Ang maong grupo gipadala ngadto sa  Mindanao  sa wala pa ipahigayon ang election sa Autonomous Region in Muslim Mindanao (ARMM) ug gipabantay kini sa piniliay  niadtong Agosto 11, 2008.

Apan hangtod karon wala pa sila makabalik nganhi sa Cebu dihang miulbo ang gubat didto tali sa mga sundawo sa kagamhanan ug sa mga rebelding Moro Islamic Liberation Front (MILF).

Ang mga asawa sa maong mga polis gibati nag kabalaka  sa kahadlok nga  mapagan ang kinabuhi  sa ilang mga minahal nga bana sa kagubot nga  miulbo  sa Mindanao.