Bangko pataora’g camera

Ang pagbutang og mga security camera sa mga establisamento sa mga bangko, pawnshop, lending firm ug uban pa, maoy higpit nga gidugang  sa  mga requirements o rikisito una  kaluwati og business permit ang mga tagdumala o tag-iya ning mga negosyo.

Kini ang ordinansa nga gipangamahanan ni Majority Floor Leader Victor Biaño nga ilang giaprobahan sa ikaduhang pagbasa sa regular session nga ilang gihimo niadtong miaging adlaw.

Si Biaño sa iyang ordinansa  mipasabot nga kining maong requirement maoy suporta usab sa gipangayo sa Bangko Sentral ng Pilipinas (BSP) nga pabutangan og mga security camera ang mga bangko ug uban pang  mga  establisamento aron masiguro gikan sa mga kamot sa mga tulisan ug mga kawatan.

Ang pagbutang og security camera maoy dako og ikatabang  sa kapolisan  sa ilang tahas pagpakgang o pagsulbad sa mga pagpanulis nga mahitabo sa mga balay patigayon  diha sa dakbayan.

Ang ikatabang ning security camera sa kapolisan mao ang sayon nga pag-ila sa dagway sa mga tulisan ug kawatan nga manglungkab o kaha aktong manulis sa maong mga balay negosyo.

Kahinumdoman nga sa nangaging katuigan pipila ka mga bangko sa Mandaue ang gihugpaan sa mga tulisan.

Naglisod sa pagsulbad ang kapolisan sa maong mga tulis tungod sa kakulang sa mga kahimanan  sa pag-ila sa mga tulisan.

Kining maong suliran  maoy nag-aghat kang Biaño sa pagtagik sa usa ka ordinansa nga ihigpit na gyud ang pagpataod og security camera sa tanang balay patigayon sa Mandaue  ug kadtong dili motuman dili isyuhan  og business permit.