Sakop sa gang gipusil

Sakop sa usa ka gang ang gitabangan sa pagkulata ingon man pusil sa grupo sa mga batan-ong mga lalaki mga alas 9:20 pasado sa miaging gabii diha sa Sanciangko St., barangay Pahina-Central.

Ang nalandig sa Cebu City Medical Center giila sa kapulisan nga si Leonard Cubacub, 21, way trabaho taga Unit 4 OPRRA barangay Kalunasan human makaangkon og samad pinusilan sa tuong bahin sa lawas sa wala matinongarmas.

Sa imbestigasyon nila ni SPO2 Rey Cuyos ug mga kaubanan sa Homicide Section sa Cebu City Police Office ang maguwang sa biktima nga si Lheenard Cubacub, 28, nitug-an nga naglakaw siya ug ang iyang manghod sa nahisgutang lugar.

Dihang ilang gikasugat ang grupo sa mga batan-on kalit lang silang giatake hinungdan sa ilang pagpanagan apan pipila ka metros ang gilay-on na corner silang duha.

Matud pa ni Lheenard nga ang mga suspetsado nagtinabangay sa pagkulata kanilang duha ug usa niini ang kalit lang mipusil ngadto sa iyang igsoon.

Giilog unta niini ang armas ug gitukmod ang suspetsado apan nalupig siya sa kusog apan swerteng adunay mga barangay tanod nga nag-roving sa dapit ug nirespondi ug nitabang kanila.

Ang mga suspetsado nagkatibulaag panagan samtang ang iyang manghod gidali nila sa pagdala sa tambalanan.