Nakaangkon og kadaot sa ulo ang usa ka sakop sa Criminal Investigation and Intelligence Branch-Barangay Intelligence Network (CIIB-BIN) human madasmagi sa naghaguros nga sakyanan atol sa iyang pagbantay sa checkpoint diha sa dalan Gen. Maxilom ning dakbayan Lunes sa gabii.
Ang nalandig sa usa sa mga pribadong tambalanan ning dakbayan giila nga si Bonifacio Boholano taga barangay Ermita ning dakbayan.
Gikatahong ang biktimang si Boholano maoy nagbantay sa tungang bahin sa karsada kilid sa sign board dihang nadasmagan sa naghaguros nga Nissan Sentra nga may plakang GDN-725 nga gimaneho ni Jan Michael Yap nga taga barangay Guadalupe ning dakbayan.
Si Sr. Insp. Aileen Recla sa CIIB nga gikahinabi sa Banat News nagkanayon nga nagkasinabot na ang kabanay sa biktima ug si Yap kabahin sa galastuhan.
Sumala pa ni Sr. Insp. Recla nga nagpabilin pa karon sa Intensive Care Unit (ICU) si Boholano. Samtang ang sakyanan napusgay ang windshield.
Matud pa niini kusog ang dagan ni Yap apan wala kini makabantay nga diha si Boholano sa tunga nga nagbantay sa check point gumikan kay wala gyud siya makakita niini.