‘Bigtime’ pushers dakpan

Nasikop sa kapulisan ug nasakmitan og pinaketeng shabu ang manag live-in partners nga gitumbok nga bigtime pushers sa lungsod sa Consolacion ug mogamit og mga bata sa ilang pagpamaligya niini.

Ang gidakop sa kapulisan mao si Jimmy Coyoca Capangpangan, 37, ug Arlene Saplad, nagpuyo sa Phase-II, barangay Pulpogan sakop sa nahisgutang lungsod.

Nasikop ang duha pinasikad sa search warrant nga gidala ni Insp. Leoncio Baliguat batok kanila alas 4:00 sa kaadlawon niadtong Domingo.

Matod ni PO3 Allan Maglangit sa Consolacion Police dihang nahinabi sa Banat News dayag na sa ilang lungsod nga ang duha maoy notadong tigpayuhot og gidiling drugas sa ilang lugar.

Gikatahong wala makabantay ang mga suspek nga natulog pa niadtong higayuna dihang nangabot ang mga polis sa ilang balay apan misuway gihapon sila pangambak sa bintana apan nagpaabot na kanila sa ubos ang mga polis.

Ang kapulisan naka-recover gikan sa pinuy-anan sa mga suspek og 31 ka gagmay’ng pakite nga gituohang dunay sulod nga shabu nga tag P200 ang kantidad ug laing duha ka dagkong pakete nga dunay sulod nga shabu.

Dugang nahipos nga impormasyon sa kapulisan nga ang mga suspek dunay mga higayun nga mogamit og mga bata sa mao nilang illegal nga transaksyon.