Mag-uuma sa Tuburan gipusil

Naa sa kritikal nga kahimtang karon ang usa ka mag-uuma human siya pusila sa usa ka wala hiilhing armadong tawo samtang nagtan-aw siya og salida sa telebisyon didto sa balay sa iyang paryente sa barangay Sandayong, lungsod sa Tuburan sa miaging gabii.

Ang biktima mao si Juan Angel, 57, ulitawo ug mag-uuma sa Sandayong.

Matud ni PO3 Jonard Loyao sa Tuburan Police Station sa pakighinabi sa Banat News nga sa wala pa pusila ang biktima , nalingaw kinig tan-aw sa salida sa TV hinungdan nga wala makabantay dihang misaka sa balay ang kriminal ug walay tingogtingog nga miluthang kaniya.

Ang biktima naka-angkon og samad pinusilan sa walang bahin sa dughan ug gihatod dayon kini ngadto sa Vicente Sotto Memorial Medical Center (VSMMC) dinhi sa dakbayan sa Sugbu.

Samtang ang wala hiilhing kriminal kinsa nakit-an sa mga saksi nga  miambak sa balay human sa pipila ka buto-buto sa armas de fuego padayon pang gipanid-an karon sa kapolisan.

Ang mga silingan sa biktima  miangkon nga ang tumang kangitngit sa kagabhion  maoy nakapakgang kanila sa pag-ila sa kriminal.

Ang kapolisan padayon pa sa ilang imbistigasyon aron sa pagtumbok sa namusil  ug ang pagsuta kundili ba kini personal nga kontra sa biktima.