15-anyos gitulis gipusil

Samad sa tuong abaga ang nahiaguman sa usa ka 15-anyos nga babaye human gipusil sa usa sa tulo ka tulisang mga lalaki nga nagsakay og motorsiklo mga alas 8:00 sa niaging gabii diha sa Hi-way 77  sa barangay Talamban ning dakbayan.

Ang biktima nga nalandig sa North General Hospital  giila sa kapulisan nga si Karen Michelle Flores nagpuyo sad sa nahisgutang lugar.

Tulo ka wala mailhing mga lalaki ang gitumbok sa biktima nga maoy nitulis ug nipusil kaniya.

Si PO1 Rene Remedios sa Talamban Police Station sa pakighinabi sa Banat News nitug-an nga naglakaw padulong mopauli sa ilang panimalay si Flores dihang kalit nga nibutho ang mga suspetsado nga nag-angkasay sa usa ka motorsiklo nga kolor puwa.

Kalit lang gitionan sa armas ug gimanduan sa paghatag sa iyang cell phone nga nagkatindad og P10 mil  apan ang biktima nidumili unta kini apan sa kahadlok iyaha nalang kining gidunol  dungan sa pagtukmod sa suspek nga naggunit og armas.

Dali dayong midagan si Flores apan usa sa mga suspetsado ang mipusil kaniya hinungdan nga maayong pagka-igo sa iyang tuong abaga dayon sibat palayo sa maong lugar samtang ang biktima gidali sa pagdala sa tambalanan.