Tawo giluba kay wa motilaw sa babaye

Usa ka tawong gihagad sa babaye aron padimdimon og  lawasnong kalipay, nadunggaban dihang iyang gibalibaran ang maong babaye kagahapon sa kaadlawon  diha sa barangay Kalubihan ning dakbayan sa Sugbu.

Ang biktima mao si Augustoi Juntorial, 36, nagpuyo sa Escario street ug maoy ikaduhang nadunggaban kagahapon sa kaadlawon.

Unang nalandig sa Cebu City Medical Center (CCMC) sa mga alas 2:00 pasado sa kaadlawon mao si Marlon Carciller, 27, taga F. Villa St., barangay T. Padilla .

Ang midunggab kang Carciller nailhan nga  si Wilbert Singson “alias Hapon”, Larry Jaladoni, ug usa ka Marvin nga gikatahong sakop sa “Bloods” Gang.

Sa imbestigasyon nila ni SPO1 Rogelio Nedamo sa Homicide Section sa Cebu City Police Office ang biktima gikatahong uban  sa mga suspetsado nga nag-inom.

Unya dihang nangalasbag na mitumaw ang panaglalis ug dihang mipauli na ang biktima gisundan siya sa tulo ug gisumbag siya sa usa niini apan ang usa  milanit sa ice pick ug gihansak ngadto sa nagkalainlaing dapit sa lawas sa biktima.

Bisan kun samaran sa ibabaw nga bahin sa walang abaga  ug sa ubos nga bahin sa buko-buko, nakahimo pa  sa pagdagan ang biktima ug nakaabot pa sa  ilang balay ug  nakapangayog panabang sa iyang mga ginikanan ug igsoon.

Samtang nianang pagka- alas 3:30  sa kaadlawon si Juntorial mao na usab ang  giluba sa grupo sa mga batan-on diha sa Colon, barangay Kalubihan.

Si Juntorial nasabak sa  tuong tudlo ug nagkadaiyang pangos sa lawas kay gitabangan usab siyag kulata ug gikuha pa  ang iyang P5,000  sa iyang pitaka.

Ang biktima mibutyag nga uban siya sa iyang mga kauban diha sa maong dapit kay nangitag videokihan aron sa pagkanta-kanta.

Unya usa ka  babaye miduol kanila ug nanghagad og short time apan gibalibaran sa biktima busa puwerting sukoa sa babaye,

Diha-diha miabot ang grupo sa mga lalake  nga kauban sa babaye  ug gitabangan siyag kulata apan usa kanila ang milanit og kotsilyo ug gihansak kini ngadto sa biktima ug lain usab ang mihapak og bato sa iyang ulo.

Dihang misaliring na ang biktima sa yuta, mikaratel og panagan ang mga namaregla kaniya ug hinayhinay siyang mibangon ug mipaingon ngadto sa tambalanan.