Reporter gihulga sa bodyguard sa mayor

Midangop sa kapolisan sa Presinto 1 sa Centro Police Station ang usa ka tigbalita sa DYSS sa GMA-7 tungod sa kahadlok sa gihimong pagpanghulga sa bodyguard ni Mayor Jonas Cortes kinsa mikasa sa iyang armas.

Ang insidente gikatahong nahitabo niadtong Sabado sa gabii diha mismo sa ilang lugar human magkagubot ang mga residente ug iyang kabanay sa maong dapit.

Ang biktima mao si Norman Mendoza, kinsa nagpuyo sa maong dapit  ug ang suspetsado nga naghulga kaniya giila nga mao ang usa ka Jonas Desuyo,   sa sitio Tambis sa Ibabao-Estancia sa maong dakbayan.

Si PO1 Arthur Cuyos nga nahinabi sa Banat News miingon nga subay sa gisugilon ni Mendoza ngadto kanila maoy nasayran nga nagpakisusi  lang kini sa  nahitabong kagubot sa maong dapit.

Gikasuko sa suspetsado ang pag-apil apil ni Mendoza ug diha-diha giingong mibunot kini og armas nga kalibre 45 pistola dayong hulga ngadto sa tigbalita.

Hinuon gipanghimakak ni Mandaue City Administrator Bricio Boholst nga bodyguard sa mayor ang  suspetsado dihang nahinabi sa mga tigbalita.

Gitataw niya nga walay nagdala sa pangalan nga Jonas Desuyo sa mga bodyguards sa mayor sa maong dakbayan apan padayong giinsister ni Mendoza sanglit kanunay man kini niyang makita nga kuyog sa mayor sa panahon nga aduna kini lakaw.