2 bulang bata gitigbas

Walo ka tahi sa ulo ang naangkon sa duha pa ka bulan nga batang lalaki human apila og tigbas sa ugangan sa iyang iyaang babaye sa sitio Tambo barangay Kawit lungsod sa Medellin mga alas 9:30 sa gabii niadtong Biyernes.

Ang bata giilang si Rodel Rusatasi kasamtangan pang giatiman sa mga doktor diha sa Vicente Sotto Memorial Medical Center human tahia ang dakong gisi sa ulo niini.

Samtang samdan usab sa iyang ubos nga bahin sa walang bukton ang iyang inahan nga si Ruby Rusatasi ug samad sa tuong bukton usab ang naangkon sa iyaan sa bata nga si Loveth Rusatasi Bayon-on.

Giila ang suspetsado mao si Enerio Bayon-on 53, biyudo, ugangan ni Loveth nga nagpuyo usab sa nahisgutang dapit kinsa dali kaayong nikagiw human sa pagpanigbas ginamit ang pinote.

Si SPO1 Roland Reyes sa Medellin Police Station nga gikahinabi sa Banat News nagkanayon nga sa sayo pa niana nagkalalis ang suspek kang Loveth, hubog niadtong tungura ang suspek nga niduaw sa ilang panimalay gikan sa pista sa sitio San Roque sa nahisgutang barangay.

Matud pa ni SPO1 Reyes nga nangayo ang suspek ni Loveth og kwarta apan gikatahong nasuko ang suspetsado kay gamay ra kaayo ang gihatag.

Ang maong salapi gikatahong kabahin sa gipadala sa anak sa suspek nga bana  ni Loveth nga nagtrabaho sa Manila hinungdan nga nagkainit ang ilang lalis ug diha-diha gisaka niini ang mga biktima ug gipanigbas.

Ang igsoon ni Loveth nga si Ruby nga nagkugos sa duha ka bulang bata kinsa didto usab sa taas sa panimalay giapil usab sa pagtigbas.

Ang suspetsado padayon pang gipangita sa kapulisan sa lungsud sa Medellin samtang gihikay pa ang tukmang kasong ipasaka batok niini.