Helper natumba patay

Diskompyado ang pamilya sa usa ka katabang dalaga kinsa nakit-an nalang patay sulod sa pinuy-anan sa iyang amo diha sa barangay Bulasa lungsod sa Argao niadtong Sabado sa alas 5:00 sa buntag.

Ang katabang mao si Maria Cristina Gonzaga, lumad nga taga Tabuelan ug nagtrabaho isip katabang sa pamilyang Miñoza sa nahisgutang lugar.

Matud ni PO1 Benjamen Geyrozaga sa Argao Police dihang nahinabi sa Banat News ang amo niini nga si Alex Miñoza maoy nakakita sa katabang nga natumba ug nabuy-od dili layo sa comfort room human kini gituohan nila nga nakuyapan.

Gitabang kini sa amo og gidala nila sa Isidro Kintanar Memorial hospital apan paglabay sa pipila ka minutos gikan sa paghiabot sa tambalanan namatay kini.

Matud ni PO1 Geyrosa nanawag sa ilang buhatan sa nilabay'ng gabii ang ginikanan sa biktima gikan sa lungsod sa Tabuelan ug nangutana kabahin sa resulta sa gipahigayong autopsy.

Ang kapulisan nagpaabot pa karun sa resulta sa autopsy aron mahibaw-an ang hinungdan sa kamatayon niini.

Subay sa inisyal nga imbestigasyon walay nakitang mga samad o bun-og sa kalawasan sa biktima nga gidudahan sa iyang mga amo nga posibleng gi-atake o ba kaha dunay gitago nga sakit ang biktima ug maoy posibleng hinungdan sa kamatayun niini.