Interpol-ICMP misaad nga di mohunong hangtud mailhan tanan

Misaad ang kadagkoan sa International Police- International Commission for Missing Persons nga di mohunong sa ilang paningkamot nga mailhan ang matag patay'ng lawas nga marekober gikan sa Romblon ug sa mga narekober na niadtong milabay'ng buwan.

Si Interpol Secretary General Ronald Noble nagkanayon nga tumong sa ilang pundok mao ang pag-ila sa mga patay'ng lawas aron usab mapahimutang sa ilang mga kabanay ug mahatagan og maayong lubong.

Ang DNA testing nga didto pa gihimo sa Sarajevo, Bosnia maoy giisip nga labing epektibo, makuti apan maoy labing kumpleto ug eksakto kun ang resulta maoy hisgutan.

Gihulagway ni Noble nga mao kini ang labing importanteng adlaw karong nigawas na ang unang resulta sa DNA test dinhi sa nasod apan duna pa gihapoy susamang mga gimbuhaton nga mosunod nilang himuon.

“This is a very important day in the DVI process in the Philippines, and in the days and weeks ahead there is still a lot of complex forensic identification work to be done,” asoy pang Noble.

Si Noble nagkanayon nga sa pagsugod palang sa pagbuto sa balita kabahin sa maong trahedya nasayod na siyang daan nga dili kayahon sa gobiyerno sa Pilipinas nga mag-inusara niining maong gimbuhaton maong mipresentar ang Interpol inabagan sa ICMP susama sa ilang gihimo sa ubang nasod nga nasugamak og trahedya sama sa Thailand Tsunami ug sa giyera sibil sa Bosnia diin linibo ka tawo ang na-missing.

Samtang ang ICMP-Cebu nipasidaan sa mga kabanay sa ubang mga biktima sa maong  trahedya nga maghuwat sa ilang tawag kung naabot na ang resulta ug mamahimo na nilang kuhaon ang lawas.

Kini aron di magkagubot diha sa ilang buhatan ug aron usab marespetuhan ang mga minatay.

Si Dr. Renato Bautista, pangulo sa NBI-DVI team dinhi miangkon nga sa pagsugod palang miangkon na siyang di kayahon sa ilang grupo ang susama niini kadakong trabaho bisan paman sa ilang pagka-eksperto.

Mapasalamaton hinuon si Bautista sa pag-ayuda sa Interpol ug ICMP bisan wala nila kini tawga, ang Interpol ug ICMP mipadala og libreng 3,000 DNA testing kits, nipadala og refrigerated vans ug mobile morgue dinhi nga ilang gastos.

Samtang si Kathryne Bomberger, pangulo sa ICMP midayeg usab sa propesyonalismo sa mga Filipino DVI tungod kanila nahimong mas sayon ug paspas ang proseso sa ilang trabaho.

Ang inahan sa usa sa mga nailhan na pinaagi sa DNA test mao nga si Narcisa Antimaro,74, taga dakbayan sa Toledo sa pakighinabi sa Banat News kagahapon naghilak nga nipadayag sa iyang pasalamat sa mga ahensyang miila sa iyang anak.

Matud pa niya wala siya kawad-i og paglaom sa pagpaabot sa resulta human siya ug ang iyang mga anak gikuhaan og bloodstain sample aron ikumparar sa femural bone sample sa iyang anak nga na-missing nga si Jonathan, 38.

“Nipasalig man sila namo nga mauli ang akong anak maong nituo gyud ko pero wala na lagi kinabuhi,” sumala pa ni Narcisa nga nagpunay og tulo ang luha.

Si Jonathan usa ka beautician sulod sa 10 ka tuig sa Manila miuli sa Cebu aron unta saulogon ang iyang ika-39 anyos nga birthday niadtong Hunyo 24 apan Hunyo 21 samtang sakay sa MV Princess of the Stars nasugamak kini sa maong trahedya.

Mismong si Bomberger mialam-alam kang Narcisa ug migakos kaniya aron kini pakalmahon samtang naghapuhap sa tiguwang. Matud pang Bomberger nga sakit man ang nahitabo apan mas maayo nalang nga nailhan ang patay'ng lawas niini.