BID-7 adunay asst. komisyoner

Ang Bureau of Immigration and Deportation (BID)-7 mibutang ug bag-ong Special Assistant to the Commissioner for Visayas nga molantaw sa mga kalihukan sa BID sa Rehiyon 6, 7 ug 8.

Siya mao si  Romeo L. Junia, kinsa gawas nga special assistant to the commissioner, siya usab ang  OIC Regional Director sa BID 7, kay si Dr. Reynaldo Almadin mao may Alien Control Officer sa maong ahensya.

Nasayran sa Banat News nga si Junia maoy kanhi Assistant Secretary sa Presidential Management Staff (PMS) ubos ni PMS Secretary  Cerge Remonde nga usa ka Sugbuanon.

Si Junia misugod og lingkod sa bag-o niyang katungdanan diha sa BID-7 niadto lang Agosto 1 nunot sa kamandoan ni Commissioner Marcelino Libanan sa BID.

Ang katungdanan ni Junia  mao ang pagmonitor sa mga buhatan sa BID sa tulo ka rehiyon ug siyay mohilot sa tanang suliran nga may labot sa imigrasyon gikan sa maong lugar, ug kun lisod nang hiloton una pa niya kini ihandos ngadto sa ilang ulohang buhatan aron si Komisyoner Libanan na maoy mopakanaog og desisyon.

Gipasabot usab ni Junia nga ang BID 7 dumalahon gyud ni Dr. Almadin bisan kun siya (Junia) anhi magbase  sa buhatan sa BID-7.

Sa pagkakaron maoy gipaabot  ni Junia ang kooperasyon sa tanang mga sakop sa BID sa Rehiyon 6, 7 ug 8 alang sa kalamboan sa mga programa sa maong ahensya  nga nasudnon sa kagamhanan.