Rampa sa Carbon ihinayon
Gikapoyan na si Cebu City Mayor Tomas Osmeña nga naghuna-huna sa iyang tukuron nga rampa diha sa Carbon Public Market nga magdugtong sa tulo ka unit sa nahisgutang merkado publiko.
Kini human moatras ang kontraktor sa maong proyekto ug wala gyud masugdi ang pagtukod sa rampa nga gigahinan sa kagamhanan sa dakbayan kaniadto og P130 milyones.
Ang WT Construction giingong mikanselar sa kontrata sa proyekto tungod sa nadilatar pagsugod sa ilang trabaho ug naabtan na lang sa pagtaas sa presyo sa mga materyales.
Taliwala hinuon niini disedido gihapon si Osmeña sa pagpadayon sa nahisgotang proyekto, apan iyang giangkon nga magsugod na usab sila sa sinugdanan.
Kini tungod kay tun-an na usab sa City Hall ang maong proyekto aron sa pagtino kung pila na ang gastuhon sa pagpatukod niini.
Nagkanayon si Osmeña nga kung wala nay laing kakulian, posibling kasugdan na sa sunod nga tuig ang pagtukod sa nahisgutang proyekto.
Una nang gipadayag sa pangulo sa Cebu Market Vendors Cooperative (CEMVEDCO), Erwin Goc-ong, nga mahinungdanon kanila ang katukoran sa rampa kay pinaagi niini, mahatagan na og igong mga kostumer ang mga stall holder sa ikaduhang andana sa Carbon Public Market nga iya usab nga mga sakop.
Kun matukod ang rampa adto na unya sa second floor moagi ang mga sakyanan nga mulahos sa Carbon area.
- Latest
- Trending
