Innova gi-drayba’g hubog nga polis nabangga sa kauban

Mag-atubang karon og imbestigasyon ang usa ka polis kinsa giingong hubog ug mi-drive sa usa sa mga Toyota Innova Patrol car gikan diha sa motorpool sa General Services niadtong milabay’ng gabii nga miresulta sa pagkadasmag niini sa laing patrol car sulod sa maong garahian.

Ang mag-atubang og imbestigasyon mao si PO1 Crisostomo Bayato, sakop sa Mobile Patrol Group kinsa  maoy driver sa nahisgutang patrolcar nga may body number Car 010 ug may plakang SHN-898.

Ang maong polis gikatahong padulong na mogawas sa maong garahian sa South Road Property atol sa pagmaniobra nadasmagan niini ang giparking nga laing Toyota Innova patrolcar nga may body number 016 nga may plakang SHN-888.

Swerte hinuong walay sakay ang nabanggaan apan si Bayato gikatahong nadiskubrehang hubog niadtong tungura.

Maayong pagkalupyak sa pultahan diha sa luyo ug nabuskag ang walang rear light sa car  016 apan wala pa matino kun pilay danyos niini.

Ang maong polis gikatakdang patubagon ni Chief Insp. Arnel Banzon, hepe sa MPG kabahin sa insidente ug kung mahibaw-ang may kalapasan kining nahimo hayan mag-atubang kini og kasong administratiba.

Ang Toyota Innova maoy labing brand new nga mga sakyanan sa Cebu City Police Office ug maoy labing daghan og aksidenteng nasugamakan sukad nga kini napalit duha ka tuig na ang nakalabay.