SK abolition supakon

Dakong supak ang SK Federation president sa siyudad sa Sugbu nga si Rengelle Pelayo sa gibanhaw nga plano pagwagtang sa Sangguniang Kabataan (SK).

Labing minos upat ka mga kongresista ang bag-o lang niduso og tagsa-tagsa nila ka balaudnon nga alang sa SK abolition.

Kini mao sila si Kongresista Magtanggol Gunigundo sa segundo distrito sa Valenzuela (HB 1243), Lorna Silverio sa tersero distrito sa Bulacan (HB 2063), Bernardo Piñol Jr. sa segundo distrito sa North Cotabato (HB 2422), ug Kongresista Jose Solis sa segundo distrito didto sa Sorsogon (HB 2999).

Alang sa maong mga magbabalaud dili angayang hatagan og gahom ang nagpangedaron pa lang og 15 ngadto sa 17 anyos tungod sa giingong kalinghod pa sa ilang panghuna-huna.

Matud sa mga kongresista nga ang nahisgutang age bracket sa mga teenagers mao pa lang ang pagkakat-on kung unsa ang kahulugan sa responsibilidad.

Nidugang ang mga magbabalaud nga ang angayang buhaton sa mga batan-on mao ang pag-focus sa ilang pagtuon ug ipadaplin una ang politikanhong kalihukan.

 Giangkon hinuon ni Pelayo nga nakaapekto sa ilang pagtuon ang pagpangalagad, apan iyang gidugang nga dili usab kabugti-an ang kasinatian nga ilang makuha niini.

“Somehow maapektahan ang imong pag-eskwela but the experience dili gyud kabayran, at this young age we’re able to experience something like this, you have given the chance to participate in local governance, for teenagers given the chance murag mahimo gyud silang productive citizen in the future and that really something,” sumala ni Pelayo.

Gisalikway usab sa SK Federation president ang rason sa kalinghod sa ilang panghuna-huna nga usa sa mga hinungdan nga gitinguhang wagtangon ang ilang kapunungan.

Niingon si Pelayo nga ang ilang nasudnong kahugpungan nangita na og mga kamatuuran aron ipakita unya sa kongreso kung unsa ka epektibo ug kamabungahon ang SK.