'Nanukmag' nga polis mihimakak sa pasangil

Kusganon nanghimakak si PO1 Christian Peñafiel nga iyang gidapatan ang tiguwang nga si Donie Noel sulod sa Ronda Police Station sa niaging bulan kinsa namatay human sa upat ka adlaw.

Kini maoy gipadayag ni Peñafiel atol sa preliminary investigation nga gipatawag kagahapong adlawa sa National Police Commission (NAPOLCOM-7) uban sa iyang kaubanan dihang human nireklamo ang anak nga si Russel Noel ug mga kabanay.

Si Penafiel nangangkong igo ra niyang giwahing ang tiguwang ug dili usab tinuod nga hubog siya niadtong tungura kay sa pagkatinuod niadtong maong higayon nakahimo pa siya sa pagmaneho sa patrol car.

Samtang si Sr. Supt. Carmelo Valmoria, hepe sa Cebu Provincial Police Office (CCPO) nagkanayon nga bisan paman nga adunay gihimong preliminary investigation ang Napolcom ipadayon gihapon nila ang imbestigasyon batok kang Penafiel.

Matud ni Valmoria ilang kuhaan og pamahayag ang mga opisyal ug mga polis nga didto sa pagkahitabo ug ipasa ngadto sa rehiyonal nga buhatan sa PNP ang resulta lakip na usab ngadto sa Napolcom.

Kagahapon usa sa gituki mao ang giingong gi-tampered ang blotter sa mga polis, paghubog, ingon man pagpanukmag.

Apan si Valmoria niangkon nga wa siya makahibalo niini nga gi-tampered diay ang blotter ug mipasalig nga susihon usab ang maong report.