Biktimang Joavan nanago

Pamilya sa biktima ni Joavan Fernandez ug kaubanan gibati og kahadlok gumikan sa padayong kagawasnon ni Joavan kinsa anak sa mayor sa dakbayan sa Talisay.

Gikatahong gumikan sa kahadlok sa ilang seguridad, si Mercidita Abellana iyaan nila ni Winston ug Osbert nga maoy gipangulata ang nagtago-tago na.

Hasta ang mga silingan usab nila ni Mercidita diha sa sitio Kimba, barangay Cansojong gibati  nasad og kabalaka tungod sa kahadlok nga maamong.

Kagahapon sa buntag si Sr. Insp. Jovito Canlapan uban ni PO3 Arnold Damasco ug PO1 Epifanio Comendido Jr. ang miadto sa balay nila ni Mercidita  diha sa barangay Cansojong apan wala na diha ang tulo tungod kay nagtago.

Si Canlapan sa pakighinabi niini sa Banat News kagahapon sa buntag nagkanayon nga ang ilang tumong sa pag-adto sa maong lugar mao ang pagkuha og pamahayag kang Mercidita kabahin sa giingong pagkuha ni Joavan sa iyang TV ug DVD player aron mapasaka ang kasong robbery batok sa suspetsado.

Ang igsuon lang ni Mercedita ang naabtan sa maong mga polis nga si “Mary” tungod kay wala na mouli sa iyang balay ang biktima  uban ang mga anak.

Ang hepe sa kapolisan sa dakbayan Superintendent Romeo Perigo sa pakighinabi niini sa Banat News kagahapon nagkanayon nga gihuwat nila ang biktima nga moanha sa ilang buhatan aron makuhaan kini og affidavit ug mapasaka ang kasong robbery batok sa anak sa mayor.

Niadtong milabay’ng Martes midangop sa Criminal Intelligence and Detection Group-7 (CIDG-7) ang mga biktima ug si Mercedita ug nagpatabang, ang CIDG-7 nagkanayon nga ilang kasuhan si Joavan og robbery with intimidation.

Matud ni Perigo andam silang mohatag og seguridad sa pamilya apan mipasidaan nga limitado kini.

Gisalikway usab ni Perigo ang kabalaka sa mga Talisaynon nga “untouchable” si Joavan tungod kay ilaha man kining napapriso kaniadto dihang nalambigit kini sa kasong pagpatay.