Lola gitulis, gilugos, gipatay

Gitulis pagkahuman gilugos una pa gipatay ang usa ka 65-anyos nga lola nga gituohang gidakdakan pa og bato sa ulo nga nakit-an nalang nga patay taliwala sa kalibunan dili layo sa iyang pinuy-anan sa bukirang bahin sa barangay Veto lungsod sa Barili alas 8:00 sa buntag niadtong Lunes.

Ang biktima nga gituuhang gipatay niadto pang Domingo sa gabii mao si Anastacia Caramihan, 65, dunay live-in partner ug nagpuyo sa nahisgutang lugar samtang nailhan na sa kapolisan ang responsable.

Gibutyag ni SPO1 Zaldy Orillo sa Barili Police dihang nahinabi sa Banat News nga posibleng gitulis pagkahuman gilugos ang biktima una pa gipatay.

Gikatahong dunay mga samad ang kinatawo niini ug hubo na ang tibuok lawas, gituohan usab nga gidakdakan og bato ang ulo niini tungod kay nalupyak na kini ug daghan pang mga pangos ug bun-og ang kalawasan.

Subay sab sa gipahigayung autopsy sa medico legal officer sa maong lungsod nasuta nga dunay duga sa kinatawo sa lalaki diha sa kinatawo sa biktima.

Sa inisyal nga imbestigasyon sa kapulisan gikan sa kapuyo sa biktima nga si Santos Siaton, 84,  gitug-an niini nga nananghid ang biktima niadtong Domingo sa alas 2:00 sa hapon nga molakaw aron pagsusi sa yuta niini sa sikbit nga barangay sa Cabcaban.

Nianang pagkaalas onse sa gabii namatikdan niyang miabot kini diha sa silong apan sa iyang paglili sa bintana nakit-an niya nga dunay kuyog nga lalaki ang biktima.

Apan dihang iya na untang iwagan sa lamparilya kalit nga nangahanaw ang duha hinungdan nga nibalik nalang siya og katulog apan nianang pagkabuntag iya nalang nahibaw-an gikan sa mga silingan nga nakit-an ang patay’ng lawas niini gibana-banang 50 metros gikan sa ilang balay.

Matud ni SPO1 Orillo pagkakarun nailhan na nila ang pangalan ug gikumpleto nalang nila ang mga ebidensiya aron pagsikop niini ug giandam na sab nila ang kasong rape with homicide nga gitakdang ipasaka kagahapong adlawa.

Dugang nahipos nga kasayuran sa kapulisan nga ang biktima tigpahulam kini og kwarta sa maong lugar ug  mao kini usa sa gisubay nga maoy posibleng hinungdan sa pagpatay.