Drayber sa traysikad mireklamo

Ang mga drayber sa traysikad  nagpanon kagahapon sa buntag paingon  ngadto  sa city hall sa dakbayan sa Talisay aron ipaabot ngadto sa buhatan sa Talisay Traffic Commission ang ilang pagsupak sa gigamang ordinansa sa dakbayan.

Mokabat silang tanan og  1,000 kansang mga traysikad ilang gilaray sa  atubangan sa city hall.

Si Julius Bacus, 43, usa sa mga operator sa traysikad sa siyudad  mibutyag sa mga tigbalita nga misupak sila sa ordinansa nga nagtugot lang sa mga traysikad og  lima ka oras nga makasulod sa provincial road gikan sa  alas 5:00-7:00 sa buntag ug 4:00 sa hapon hangtud sa alas 7:00 sa gabii.

Si Bacus nga adunay 20 ka unit sa mga traysikad nga nagdagan sa Talisay  mipadayag sa iyang kasagmuyo kay  makaapektar  kini sa ilang panginabuhi.

Ang ordinansa kabahin sa traysikad  napasar  niadtong tuig 1992 apan niining bag-o lang kini giamendahan.

Ang mga drayber sa traysikad nga nagpanon ngadto sa city hall naggikan sa barangay Dumlog, Cansojong, Poblacion,  Tanke ug San Roque.

Si Bacus hinoon nagkanayon nga  malamposon ang ilang hangyo nga gipadangat sa traffic commission tungod kay gihatagan og lugway nga oras nga makagawas diha sa provincial road apan ubos sa kondisyon nga desiplinahon nila ang ilang  mga sakop aron dili makabalda sa trapiko.