Shabu nihit na

Nagkanihit na karon ang supply sa ginadiling drugas dinhi sa dakbayan sa Sugbu partikular na sa methamphetamine hydrochloride o mas naila nga shabu.

Kini maoy gibutyag ni Cebu City Councilor Agustus Pe Jr., kinsa mao usab ang co-chairman sa Cebu City Anti-Drug Abuse Council (CADAC).

Ang gibasihan sa konsehal sa pagnihit sa supply mao ang gihuptan niining statistics nga giingong nagpakita nga niminos na ang problema sa ginadiling drugas sa siyudad.

Labaw sa tanan, mao ang gikatahong pagmahal karon sa presyo sa bulto (5grams) sa shabu nga gipamaligya dinhi sa siyudad.

Nagkanayon si Pe nga ang presyo sa usa ka bulto sa shabu mokantidad na karon og P70,000 ug kini giingong mas taas itandi sa presyo sa miaging lima ka tuig.

“Basta momahal gani ang presyo nagpasabot na nga nihit ang supply kung ang law of supply and demand atong basihan,” sumala sa konsehal.

Ang gihimong subsob nga operasyon sa kapolisan ingon man sa Philippine Drug Enforcement Agency (PDEA) maoy gitumbok sa konsehal nga nakapaminos sa supply.

“Maglisod na man ang mga drug pusher pagpayuhot og drugas kay alerto atong otoridad gawas sa pagpahigayon kanunay og buy bust operation ug pagpangronda,” matod ni Pe.

Dugang niini miingon ang konsehal nga nagpadayon usab ang ilang gihimo nga information dissemination sa kabarangayan lakip na sa mga tunghaan.

Nagkanayon si Pe nga ang nag-unang target sa nahisgutang kampanya mao ang kabatan-onan tungod kay kini giingong maoy dali nga madani paggamit sa ginadiling drugas.

Sa pikas bahin, nanawagan usab ang konsehal ngadto sa mga mulopyo sa kabarangayan ilabi na sa mga ginikanan nga motabang sa ilang kampanya pagsumpo sa maong problema.

Alang kang konsehal Pe, ang pagsulbad sa ginadiling drugas responsibilidad sa tanan ug dili lang sa mga namunuan sa kagamhanan.