Casis mihimakak

Kusganong gipanghimakak sa usa ka Magdalena Casis nga siya nangolekta og bayad sa pipila ka mga sakop sa Veterans Drive Homeowners Association diha sa barangay Lahug.

Labing minos 19 ka household members ang gikatahong nangreklamo batok kang Casis ug niluwat og affidavit nga nagtumbok kaniya nga maoy nangolekta og bayad.

Kini aron libre nga makatukod og balay diha sa ilang nahimutangan nga gitakda na usab nga i-demolish sa kagamhanan sa dakbayan sa Sugbu.

Napagya ang gikatahong pagpangolekta dihang gipadalhan og notisya  ang mga household members sa asosasyon bahin sa demolisyon.

Apan matod ni Casis sa iyang pagbisita sa DYHP-RMN Cebu nga wala mahitabo nga siya nangolekta og bayad sa mga sakop sa nahisgutang homeowners association.

Nahibulong hinoon ang labaw sa Department for the Welfare of the Urban Poor (DWUP) sa City Hall, Danny Gabiana, kun nganong siya maoy gitumbok sa apektadong mga molupyo.

Nasayran nga si Casis niduaw sa buhatan ni Gabiana kagahapon, ug nangayo og kopya sa giluwatang affidavit sa mga household members gawas sa pagpanghimakak sa pasangil.

Apan pakyas si Casis sa iyang tinguha tungod kay kini gibalibaran ni Gabiana tungod usab sa pipila ka mga hinungdan.

Gisuwayan og kuha sa iyang habig si Casis sa Banat News pinaagi sa telepono, apan kini nagdumili pagpakighinabi ning tagsulat.

Apan kasaligang tinubdan nga nahinabi ni Casis nibutyag nga kini mihagit sa DWUP lakip na ang Local Housing board pagpagawas sa pangalan sa mga reklamante.

Sa samang higayon gihagit usab ni Casis ang mga reklamante nga mopakita og mga ebidensya nga siya nangolekta kanila.

Giangkon ni Casis nga ang pasangil sa mga reklamante nakahatag og kahasol kaniya, gawas sa kauwaw nga iyang naangkon.

Subay niini, nibahad si Casis pagpasaka og tukmang kaso batok sa mga reklamante kung kini dili makapamatuod sa ilang pasangil.

Una nang gibasol ni Mayor Tomas Osmeña ang apektadong mga molupyo tungod kay nasayod na silang daan nga dili husto ang ilang gihimo apan nibayad lang gihapon.

“That’s a very clear violation, ila na nang problema, I just want to make it clear nga these people knew that it’s illegal but you take your chance! Do you feel lucky?,” sumala ni Osmeña.

Ang mayor nakahukom na pagpa-demolish sa mga molupyo sa Veterans Drive Homeowners Association lakip na sa 1321C Homeowners Association nga illegal nga nitukod og mga panimalay diha sa Sugbu Home.